mamoca sarwa pape byah, palaya swa sada siwa,
Om papaham papa karmaham, papa atma papa sambahwa,
trahimam pundarika sah, sabah ya byan tarah suci .
Om Ksanta wya kaika dosah, ksanta wya waciko mama,
ksanta wya manaso dosah, tat premadat keswame swamem.
Om Anugraha mano haram, Dewa data nugrahakam,
Arcanam sarwa pujanam, namah sarwa nugrah hakam,
Om Dewa Dewi maha sidhyam, Yadnyanta nirmalaatmakam,
Laksmi sidhisca dhirgayuh, nirwigna suka wredhisca.
OM SWASTYASTU OM AWIGNAMASTU NAMA SIDHAM SIDHI RASTU LAKSMI YA NAMA SWAHA.
Pangaksamaning hulun ri pada Bathara Hyang mami, Sang ginelar ring sarining Ong kharaattma mantra, ring hredaya sunia layem, Sang sidha Yogi Swara, Sira nugraha Manawa kapurnani Sang wus lpas, Ong nama siwaya, Ong nama Bhudaya. sembahing hulun ri pada Bhatara, Moga luputa mami ring tulah pamidi, makadi wigrahaning mala papa petaka, katekaning hulun majaraknang tattwa purana, sida tan kataman upedrawa de Bhatara Hyang mami, apan pakulun mratyaksaken attita, nagata, wartamana, muang suksmaati suksma, sarwadi, sidhirastu maweh nugraha, ya wastu paripurna manemwaaken hayu, dhirgha yusa tkeng kula gotra, Santana pratisantananing hulun.
OM Asato ma sad gamaya, Tamaso ma sad gamaya,
Jyoitir mratyor mamritam gamaya, Loka samasta suking bhawantu.
OM Ano Bhadrah kratawo yantu wiswatah.
PUPUH SINOM.
1. Ampurayang dewek tityang,
Dening pangkah nabdab gurit,
Mapi uning ngawe ledang,
Mapi uning ring ne jati,
Kadi purun sareng ngawi,
Yadyan kirang pangeweruh,
Antuk manah lintang sarat,
Sidane ngawi akedik,
Nika tuhu,
Anggen sekar srana baktya.
2. Ring niskala bhaktin tityang,
Mapuspa darmaning gurit,
Matirta manah nirmala,
Mawija manah sujati,
Matirta pangapti suci,
Panugrahan dhirgahayu,
Mogi Ratu manywecayang,
Ring wateking sarwa prani,
Sida anut,
Ring karmane sowang – sowang.
3. I Ratu meraga sunia,
Saking sunia metu tunggil,
Tunggal manguwub ring jagat,
Jagat tigane tan mari,
Tunggale menados kalih,
Kalihe mamurti telu,
Tri Sakti I Ratu ketah,
Jati Ratu mraga suci,
Jati Ratu,
Ne mungguh ring sarwa bawa.
4. Saking tiga dados patpat,
Catur Bhuja Ratu tuwi,
Mawit catur dados panca,
Panca Dewata Dewati,
Yadyan katah jati tunggil,
Dados tatujon Sang Sadhu,
Miwah tatujoning sembah,
Saking kayun sane hening,
Kadi iku,
I Ratu ngebek ring jagat.
5. Ratu malinggih ring sastra,
Meraga Hyang Saraswati,
I tambet purun mangojah,
Mawit manah tityang bakti,
Moga tityang tan kasisip,
Wastu sida antuk lantur,
Manyinahang daging tattwa,
Sane wenten saking nguni,
Singgih Ratu,
Ledang Ratu manugraha.
6. I tambet malih manunas,
Majeng Ratu Sang Lelangit,
Dening purun manglinggihang,
I Ratu ring gurit iki,
Mogi Ratu mangledangin,
Tan manemah tan memastu,
Sentanane sane tuna,
Wastu kalis ne keapti,
Wantah Ratu,
Pucuk sembah bhaktin tityang.
7. Sekalannya bhaktin tityang,
Majeng Ida Dane sami,
Bilih majeng ring Sang Wikan,
Tatas ring daginging gurit,
Muwah sampun masukerti,
Ngripta gita ngapti hayu,
Wastu sida ngampurayang,
Katunaning gurit iki,
Apan tuhu,
Sang manyurat lintang tuna,
8. Tuna indik tuna sastra,
Nenten uning ring sor singgih,
Basa basitane rusak,
Sinah tan sida ngliyangin,
Antuk tambete tan sipi,
Tan purun tityang mepanduk,
Ring Ratu Sang Kawiswara,
Ne sanmpun sinanggah luwih,
Cutet ipun,
Durus mangkin piyarsayang.
9. Gurit niki tityang ripta,
Sangkan manah mangda uning,
Ring sane sandang kasembah,
Rawuhing ring kawit riyin,
Lan sida anggen piranti,
Bhakti ring Kawitan tuhu,
Ngiket tresna para Gotra,
Mangden sida dados tunggil,
Wastu adung,
Ical letuhe ring manah.
10. Indik bantang gita tattwa,
Jati mawit saking lami,
Mungguh ring sastraning lontar,
Lontare ketah Presasti,
Ne kasungsung saking nguni,
Antuk para gotra sunu,
Nika jati pawiwilan,
Sentanane ngardi gurit,
Kirang langkung,
Ledang sami ngampurayang.
PUPUH DURMA.
1. Saking jati tityang mangkin nyeritayang,
Kawentenan maring gili,
Gili Nusa ngaran,
Wewidangan Bali Dwipa,
Kewala tanpa Bupati,
Wantah panjak, Tan wenten sane nyayubin.
2. Suwe sampun jagat Nusa sapunika,
Tan winilang ikang lami,
Tan wenten mangrengwa,
Kadi tan kewawa nata,
Kadi tlaga tanpa warih,
Wastu bedak, Nyaratang Sang ngamretanin.
3. Laksana I Panjak kadi tanpa dasar,
Reh tan wenten kagegwanin,
Sang corah mekatah,
Idep letuh rawos nyasar,
Agamane katungkasin,
Ne kesarat, Lega ngraga ne ring hati.
4. Sami ya pada ngaku – ngaku kuwasa,
Asing sakti ya maurip,
Tan surud mamunyah,
Akweh mati tanpa dosa,
Tanpa aji ikang urip,
Haro hara, Jagat Nusa sedih kingking.
5. Sekadi penyakit sane tanpa ubad,
Kadi ika kekatonin,
Jagat lan I Jatma,
Sami pada ya kelaran,
Jagat kasat tanpa warih,
Kawewehan, Solah Jatma ngusak ngasik.
6. Langkung langu jagat Nusane kelaran,
Kadi pengendaning Widhi,
Kancit wenten anak,
Maduwe pikayun welas,
Anak dusun Tani dekil,
Tanpa sastra, Nista lacur manumadi.
7. Osah balisah manahnya mengatonang,
Jagat rusak tansinipi,
Sumingkin katonang,
Sayan ngardi remuk manah,
Irika ya saget eling,
Ring Sang Nata, Ne wenten ring jagat Bali.
8. Ki Petani ngaruruh daya upaya,
Mangda sidane menangkil,
Ring Sang Nata Raja,
Mangda sida Ida tatas,
Ring jagate ne tan becik,
Jati ika, Tatujon lampah Sang Tani
9. Kocapan sampun rawuh galahe lunga,
Ki Petani taki – taki,
Ngawit ya lumampah,
Nyujur tepining segara,
Ri sampun rawuh ring tasik,
Kadi titah, Prahune sampun manganti.
10. Gelis Sang Petani munggah ring paluwa,
Prahu laju mangulati,
Jagat Bali Dwipa,
Tatan santulan ring awan,
Wastu gelis sida prapti,
Rehning sida, Ngalintang segara pingit.
PUPUH GINADA.
1. Kocap mangkin sampun prapta,
Irika ring jaba Puri,
Dening wawu kapertama,
Ngeton Puri Maha Agung,
Peliyate sada sangar,
Kadi jerih, Uning ring deweknya nista.
2. Antuk agung pisaratnya,
Jejehe tan mialangin,
Kadurus ipun ngarepang,
Mangda sida parek matur,
Majeng ring Sang ngodag jagat,
Ida tuwi, Ngewasayang Gili Nusa.
3. Praptane ring jaba tengah,
Kancit wenten ne nyagjagin,
Antuk nembe ya kacingak,
Sang tangkil masebeng dusun,
Saha gelis ya kesapa,
Ki Petani, Gelis ipun nyaritayang.
4. Sampun puput nyaritayang,
Pengrawuhe kadi mangkin,
Sang menyagjag ngagelisang,
Nandanin Sang sane rawuh,
Ayat tangkil ring Sang Nata,
Apan jati, Pabwate dahat uttama.
5. Ngiring mangkin ceritayang,
Ida Dalem Raja Bali,
Sedek Ida mabawosan,
Kairing Patih pamucuk,
Rabine tan doh ring Ida,
Ayu pekik, Malinggih ring Singgasana.
6. Yaning prade umpamiyang,
Sekadi Semara Ratih,
Mesanding ring Joli Emas,
Pahiyase sarwa halus,
Gelunge masoca mulya,
Warna warni, Penganggene sarwa endah.
7. Jati anut ring swabawa,
Sang pinaka nyakra wreti,
Wicaksana nabdab panjak,
Wastu tan wenten ne purun,
Tempal ring titah Ida,
Sami bhakti, Tuhu satya ring Samg Nata.
8. Yukti trepti ikang jagat,
Sangkan Ida Sang Nrepati,
Pradnyan manut daging sastra,
Sastra Agamane tuhu,
Anggen Ida gagelaran,
Kapiranti, Rikala nitahang panjak.
9. Pengabihe pada girang,
Ngelaksanayang swedharmi,
Prabu asih Panjak bhaktya,
Asih bhakti yukti adung,
Prabu panjak menyaratang,
Jagat trepti, Anggen ngruruh keraharjan.
10. Risedek Ida ngonjakang,
Daging sastra sarodreti,
Ring Ida para Pandita,
Kairing Patih Prajuru,
Saget wenten anak prapta,
Jatma dekil, Keater antuk parekan.
PUPUH PANGKUR.
1. Ki Petani sampun prapta,
Tur jumujug, Ring ajeng Ida Nrepati,
Nuli negak tur manguntul,
Bayu runtag tan tolihan,
Peluh metu, Ketel – ketel awak kebus,
Antuk ajerih ring manah,
Sangkan uning dewek dekil.
2. Ida Dalem lintang pradnyan,
Nuli laju, mulat arum sabda manis,
Metu sabda pangalipur,
Uduh cai panjak nira,
Koja reku, Ajrih manah marep aku,
Apan cai tuhu satya,
Sangkan kita parek tangkil.
3. Mangke nira ngucap Tanya,
Dija tuhu, desan cai prapta mangkin,
Muwah aran kita tuhu,
Tatujonta parek nira,
Kadi iku, Tanyan aku ring iriku,
Gelis kita umatura,
Wastu sida tatas sami.
4. Mangka sabda nira Nata,
Sida wastu, nglebur jerih Ki Petani,
Yukti kayun Ida nulus,
Mapasweca ring ipanjak,
Tanpa ngitung, Yadyan panjak saking dusun,
Ida taler pramasuka,
Jati Ida Prabu luwih,
5. Sesampun sida mangrengwa,
Sabdan Prabu, Sang nata luwihing budi,
Ki Dekil tan malih nguntul,
Apan jatti sampun tatas,
Ring pawetun, Wecanan Ida Sang Prabu,
Peluh ilang tanpa sangkan,
Raga kebus nenten kari.
6. Galang tan santul ring manah,
Raris matur, Ki Petani banban aris,
Kola tara bisa matur,
Ki Petani adan kola,
Kola tuhu, Uli Nusa Ratu Prabu,
Teka tangkil mangorahang,
Apang eda jati uning.
7. Gumi Nusa suba usak,
Naweg Ratu, Panjak eda liu mati,
Mati tara nawang unduk,
Asing siteng nagih kwasa,
Krana ditu, Tara ada ne kagugu,
Matungkas tanpa pegatan,
Tur masiyat ya sesai.
8. Ento krana kola teka,
Jatma Dusun, Ki Petani mawak dekil,
Twara bisa ngrawos alus,
Tata basa tara nawang,
Jani aku, Mapengidih ken Sang Prabu,
Apang ada ngarunguwang,
Panjake di selat pasih.
9. Cutet kola ngidih Raja,
Keto tuhu, Tatujon kola ne tangkil,
Jani kola pamit wangsul,
Ki Petani lawut nyembah,
Dulur atur, Pamit ring Sang ne kasungsung,
Sang Prabu raris ngandegang,
Sekonden cai mewali.
10. Kemo cai ke pwaregan,
Nunas sangu, Anggon bekel tulak wali,
Apang tusing cai seduk,
Anggon takilan di jalan,
Kemo lawut, Kawitin cai lumaku,
Ki Petani nora tempal,
Gelis ngehed tur sairing.
PUPUH GINANTI.
1. Ki Petani sampun mantuk,
Kantun Ida Sang Nrepati,
Mameneng ring Singgasana,
Mikayunin gatra jati,
Dening jagate ring Nusa,
Tan wenten sane ngetangin.
2. Sri Dalem kagyat ring kayun,
Gelis Ida ngandikain,
Para Mantri Bhagawanta,
Mangda gelis sida prapti,
Ring sajroning penangkilan,
Sang katitah tan nempalin.
3. Sampun jangkep sami rawuh,
Bebawose kekawitin,
Ida Dalem mawecana,
Tur nyinahang maka sami,
Unduk jagate ring Nusa,
Kadi atur Ki Petani.
4. Risampun sami mangrungu,
Indike sane sujati,
Wastu sami pada ledang,
Mengadegang Sri Bupati,
Irika ring jagat Nusa,
Antuk jagat selat tasik.
5. Dening sami pada adung,
Tur sami sanggup nyungkemin,
Tanda Mantri Bhagawanta,
Sami pada mangulati,
Arin Ida ne ring Jawa,
Tan lian ring Majapahit.
6. Ida Sri Dalem Myukut,
Aran arine ring jawi,
Nika sandang ratu pendak,
Wenang ring Nusa malinggih,
Tityang wantah cumpu pisan,
Ledang ratu mikayunin.
7. Pengabihe puput matur,
Sri Dalem gelis nyawurin,
Yan yukti kadi mangkana,
Nira juga manyumponin,
Rengwa mangke ujar nira,
Nira ngutus kita Patih.
8. Lumaris kita lumaku,
Sida aken idep mami,
Apan tuhu nora lian,
Patut kita ngelakonin,
Muwah aja kita lupa,
Ring pawarah nira mangkin.
9. Yan jati arinku tinut,
Kadi pengaptining mami,
Aturaken dasar sila,
Apan jati Sang Bupati,
Ngawe trepti ikang jagat,
Mapiranti linging aji.
10. Kawit saking idep hayu,
Bawos banban tuhu aris,
Solah manut I Tri kaya,
Tan lali bhakti ring Widhi,
Muwah bhakti ring Pitara,
Mangda sida jagat trepti.
PUPUH SEMARANDHANA.
1. Nesandang uttamang malih,
Irika ring jagat Nusa,
Tatelu ento tan lian,
Tri Hita Karana ngaran,
Apang sida kamurtiyang,
Antuk Sang pinaka Prabu,
Rehning jati ngardi kerta.
2. Drestane tandados lali,
Kewala pang manut sastra,
Miwah kecaping Agama,
Kadi ika sabdan ira,
Ring kita pinaka duta,
Moga satyanta manulus,
Satya bhakti ring I nira.
3. Yaning sampun kita prapti,
Irika ring jagat jawa,
Tan wenang kita malupa,
Ngaturang pawarah nira,
Mogi sida katerima,
Antuk ari Dalem Myukut,
Nira ngapti lintang sarat.
4. Iki muwah hana malih,
Marupa pabesen nira.
Wireh sengka dadi Nata,
Apang tragya jroning manah,
Tan wenang mapariboya,
Ring wicarane kacunduk,
Yadyan alit kang wicara.
5. Apan tuhu Sang Bupati,
Pinaka pengayom panjak,
Mangda satya ring kaucap,
Sane pelih manggeh iwang,
Sang corah patut kedanda,
Dandane sumangden anut,
Daging awig – awig jagat,
6. Malih nesandang kaeling,
Bhaktine ring Hyang Pitara,
Ne kebawos Pitra Rena,
Bhakti ring Hyang Widhi Wasa,
Ne kebawos Dewa Rena,
Bhakti ring Pandita lawut,
Sangkan wenten Resi Rena.
7. Sami tan dados kelali,
Sandang patut kelaksana,
Antuk Sang pinaka Nata,
Katekaning pun I panjak,
Kewala pang manut sastra,
Mangda nenten iwang laku,
Dasarin ban manah sudha.
8. Ne pinih uttama malih,
Kadi ling Sang Hyang Agama,
Agama wit saking Weda,
Ring Wedane munggah sastra,
Patut sastra anggen dasar,
Dening sastra jati tuhu,
Titi pengancaning sila.
9. Solah hayu lintang becik,
Ika ngaran sulaksana,
Sulaksana ika Dharma,
Darma iku ngaran Yadnya,
Ika sami wantah Sradha,
Solah bhakti ngaran iku,
Mangka sabda Bali Raja.
10. Ki Patih seleg miragi,
Sehananing sabdan Ida,
Saha misadya tan tempal,
Ring titah Ida Sang Nata,
Misadya mundut ngaturang,
Ring Ida Sri Dalem Myukut,
Irika ring Wilatikta.
PUPUH MASKUMAMBANG.
1. Kocapan Ida Dalem sampun cumawis,
Ngicenin pewarah,
Ring dane Ki Maha Patih,
Ki Patih lawut manyembah.
2. Saha atur pacang ngalungsur mapamit,
Dening sampun galah,
Ngungsi tanah Majapahit,
Ki Patih ngawit lumampah
3. Yadyan lampahe wantah ngeraga jati,
Tan ngardi sangsaya,
Antuk kayun uleng tuwi,
Ngiringang titah Sang Nata.
4. Tan kewarnan lampah Ki Patih ring margi,
Crita sampun sida,
Ngaliwatin ya itasik,
Kocap reko sampun prapta.
5. Serawuhe irika ring Majapahit,
Tuhu nora lian,
Sane patut ketangkilin,
Wantah manut kadi titah.
6. Ceritayang Ida Dalem Myukut mangkin,
Sedek masesanjan,
Kairing Ida I rabi,
Makarwa lintang satya.
7. Sayan suwe bebawose mangliyangin,
Antuk lulut Ida,
Tresna ring rabi kekalih,
Wastu liange tan pegat.
8. Durung lami ulangune ketamtamin,
Saget wenten anak,
Rawuh gumanti menangkil,
Saha atur dulur sembah.
9. Singgih Ratu naweg tityang matur sisip,
Tityang boya lian,
Wantah duta saking Bali,
Ida raka sane nitah.
10. Jatinnya ulun teki wantah pengabih,
Patih Ida raka,
Irika ring Bali Puri,
Mogi Ratu tan sangsaya.
PUPUH PUCUNG.
1. Kadi iku, Sangkan tityang sida rawuh,
Wantah tityang ngemban,
Sabdan Ida Raja Bali,
Mangda ulun, Ngaturang pewarah Ida.
2. Singgih Ratu, Jati Ratu ne katuwur,
Antuk Ida raka,
Ledang Ratu menagingin,
Apan tuhu, Wantah Ratu kesaratang.
3. Cutet ipun, Ki Patih nglanturang atur,
Manut kadi titah,
Sami sampun kapidarti,
Tur kadurus, Dalem Myukut menyawisa.
4. Yaning tuhu, Mangka sabdan Ida Prabu,
Nira tan lempasa,
Apan tuhu titah jati,
Nira tinut, Aja kita madwapara.
5. Dening sampun, Bebawose sami adung,
Sang rabi misadya,
Maninggalin jagat jawi,
Pacang nyujur, Jagate ring Bali Nusa.
6. Enjing esuk, Pacang ngawitin lumaku,
Ida Dalem nabdab,
Babekel pinaka ciri,
Mangda kantun, Kaeling rawuh kawekas.
7. Ciri iku, Pedoman ngaranya tuhu,
Preret masuwara,
Karuwannya ngaran bedil,
Neping telu, Mengaran taru cemara.
8. Kadi iku, Babekele manut kayun,
Sami sampun syaga,
Rawuhing para pangiring,
Lintang tinut, Wastu sami sampun napak.
9. Dalem Myukut, Kairing antuk Prajuru,
Pasek lan Mandesa,
Karuntutin Pande Wesi,
Jangkep sampun, Pemargine kekawitang.
10. Ki Prajuru, Sampun syaga ring prahu,
Prahu ageng jimbar,
Srana ngentap ikang tasik,
Cager lanus, Tan santulan maring awan.
PUPUH DURMA.
1. Ceritayang prahune sampun melayar,
Pelayare utara Bali,
Kawot ngangobin sang nyingak,
Mangetan laju Bahita,
Tan mangetang baya pati,
Kadi Singa, Lampah molah wana giri.
2. Sesampun rawuh madyaning segara,
Ring utaraning Toh Langkir,
Kayun Ida liyang,
Ngeton segarane jimbar,
Mwah jejeran Giri Bali,
Taru niya, Mangeluhin mangulapin,
3. Lintang waged ya iangin ngasirsirang,
Wastu Prahu laju gelis,
Kocap sampun sida,
Rawuh maring Bali wetan,
Raris wenten sabeh grimis,
Mwah maruta, Sayan suwe ngaresresin.
4. Sayan suwe peteng detdet ikang jagat,
Wastu tan sida ngatonin,
Jagat Bali Dwipa,
Jagat ilang tanpa sangkan,
langkung ageng ujan angin,
Wantah ngawag, Pejalan Prahune paling.
5. Yan miribang sampun lintang dawuh lima,
Wawu ilang hujan angin,
Saget sampun prapta,
Palwa ring tepining jagat,
Jagat Sasak ikang nami,
Ngagelisang, Prahu nyujur jala tepi.
6. Antuk suwe pelayare ring jelada,
Jantos telas sangu sami,
Rika raris Ida,
Gelis tedun napak jagat,
Tur pangiring makesami,
Dahat satya, Memarekan lan mengabih.
7. Ida Dalem nuli gelis ngruruh genah,
Panjak Weddan menyarengin,
Wastu gelis sida,
Mikolihang pagenahan,
Maka genah ngwangun Puri,
Genah ika, Tanah embet ngaran tuwi.
8. Kocap Ida sampun jenek maring Sasak,
Akweh panjak Sasak tangkil,
Nunas wisik warah,
Dening panjak sampun tatas,
Ida saking Majapahit,
Jati wantah, Terehan Sang Prabu luwih.
9. Sayan suwe malinggih ring jagat Sasak,
Sayan nglimbak akweh bakti,
Sandang papan pangan,
Jati Ida tan kirangan,
Antuk aturan Sang bhakti,
Wastu hana, Pamintaning panjak sami.
10. Wong kotane rawuhing sane ring desa,
Sami sampun manguningin,
Ring Ida Sang wicak,
Dening gatra tan pegatan,
Mawit saking panjak tangkil,
Sami pada, Mangorahang Nata luwih.
PUPUH SINOM.
1. Sami pada mangajumang,
Ida Dalem Myukut Jati,
Ring margi muwah ring jumah,
Wastu wenten ne adiri,
Penyautne kadi kalis,
Wantah Ida Dalem Myukut,
Sane patut keadegang,
Patut anggen Gusti kanti,
Gelis lawut,
Penyaute kaingkupang.
2. Dening sami pada suka,
Ngadegang Ida Nrepati,
Pinaka pangamel jagat,
Gelis lawut pun menangkil,
Ring Ida Sang Maha Resi,
Ngaturang sane kaingkup,
Indik manahnya I panjak,
Sang Resi taler nyukanin,
Yukti manut,
Kadi manahnya I panjak.
3. Manut kadi linging sastra,
Sane mengaran Presasti,
Risedek dewasa becik,
Kerawuhin para kanti,
Kesarengin para batur,
Matetujon mapinunas,
Mangda ledang menagingin,
Manah ipun,
I panjak banget nyaratang.
4. Ida Dalem Myukut sadya,
Nagingin manut pengapti,
Sraya kanti sami girang,
Rikalaning mamirengin,
Bawos Dalem sane pasti,
Risampun bawose puput,
Gelis pada ngruruh galah,
Padewasan dina becik,
Saha lantur,
Ida Dalem Kjaya – jaya.
5. Gelising tattwa carita,
Suwe sampun Sang Nrepati,
Pinaka tedunging jagat,
Jagat gemuh langkung trepti,
Watek corah sami wedi,
Antuk Ida Dalem Myukut,
Jumenenge lintang wicak,
Sangkan kayun bresih ngilis,
Ngardi adung,
Paras paros ring I panjak.
6. Dalem Myukut yukti Ida,
Tan purun mangelempasin,
Piceket Ida Sang Kaka,
Daweg pacang nilar jawi,
Akweh tattwa raja niti,
Sampun sida yukti nyusup,
Saha keanggen gagelar,
Rikala madeg Bupati,
Wastu nulus,
Kayune ngertiyang jagat.
7. Jagat trepti gemah ripah,
I pandung tan wenten malih,
Sarwa tinuku ya murah,
Sarwa tinandur ya mentik,
I panjak tan surud bhakti,
Satya nya sayan mawuwuh,
Sami teleb ring gaginan,
Pada kukuh ngardi trepti,
Kadi iku,
Sang Nata magelar sastra.
8. Tan winilang ikang dina,
Katah warsa kalintangin,
Dalem Myukut madeg Nata,
Kesarengin olih rabi,
Lan keabih antuk Patih,
Miwah jangkeping Prajuru,
Taler para Bhagawanta,
Sami pada ya sutindih,
Ngemit Prabu,
Mangda tanlempas ring tata.
9. Ceritayang reke Ida,
Risedek rahina latri,
Kayune yukti kagiyat,
Eling Ida sane nguni,
Ring titah Sri Raja Bali,
Mangda Ida sida rawuh,
Irika ring jagat Nusa,
Manut padartan Ki Patih,
Mangda durus,
Dalem Myukut dados Nata.
10. Dening jati kadi ika,
Tatujone nilar jawi,
Gelis Ida manyutetang,
Daging kayun sane jati,
Mangda sida gelis prapti,
Ring Jagat Nusa nagantun,
Antuk wawu kaweruha,
Jagat Nusa selat pasih,
Kadi iku,
Kagyating kayun ring wengya.
PUPUH GINADA.
1. Maka sami Rabi Putra,
Tan lali Ki Pande Wesi,
I Pasek lan I Mandesa,
Maka sami pada tinut,
Pacang ninggal bumi gaga,
Antuk bhakti, Muwah satya tan winilang.
2. Linggihe ring jagat Sasak,
Tan kaceritayang malih,
Dening panjak lan Pandita,
Sami pada uning sampun,
Indik Ida pacang kesah,
Maninggalin, Jagat Sasak nyujur Nusa.
3. Pemargine kekawitang,
Tanah Embet katinggalin,
Pretak jana Bhagawanta,
Sami ngeton manah remuk,
Antuk lulut asih tresna,
Dwaning yukti, Ida wicak ngamel jagat.
4. Critayang pemargin Ida,
Kairing Putra lan Rabi,
Rabi kalih Putra sapta,
Rabi mukya Putra catur,
Sane ping rwa Putra tiga,
Jangkep sami, Maka sapta lanang – lanag.
5. Pangetere mangiringang,
Prajuru lan para Patih,
Sami pada subaktya,
Pemargine sawat langkung,
Ical keton saking Sasak,
Reh pemargi, Nyaratang digelis prapta.
6. Laju Prahu kadi titah,
Dening tan wenten nyantulin,
Wastu gelis sida napak,
Jagate sane katuju,
Manah egar tan jangkayan,
Yukti gelis, Perahune nepi jagat.
7. Kacerita sampun prapta,
Ring Nusa Penida jati,
Ida Dalem miwah wadwa,
Di gelis ya pada tedun,
Tur mitatas ikang jagat,
Jagat rimrim, Wastu resres sang ngatonang.
8. Kalunga – lunga kang wreta,
Sapengrawuh Sang Nrepati,
Jenek malungguh ring Desa,
Ngaran Desa Ped ya tuhu,
Kairing Premanca Putra,
Miwah Rabi, Metaki ngetangin jagat.
9. Mangka karenga de panjak,
Crita Ki Petani Dekil,
Rengwa gatra sane prapta,
Jati Ida Dalem Myukut,
Manah ipun liang girang,
Dening yukti, Mepala nguni tangkilnya.
10. Gelis ipun medabdabang,
Sarat manah pacang tangkil,
Mangda sida ngeton tatas,
Sang sane jumeneng Prabu,
Pasemengan pun lumampah,
Tuhu gelis, Rawuh maring Ped Puriya.
PUPUH PANGKUR.
1. Kocap reke maring Puryan,
Dalem Myukut, Risedek Ida malinggih,
Kairing Patih Prajuru,
Saha putra maka sapta,
Tur malungguh, Dabdab trepti saha nyatur,
Yukti manut pawilangan,
Ring swadarmaning pengabih.
2. Sira Dalem metu sabda,
Saget rawuh, Ki Petani sane Dekil,
Sembah bhakti lawut matur,
Duh Sang Raja kola panjak,
Dugas dangu, Kola tangkil Bali Prabu,
Kola ngidih apang ada,
Di Nusa Penida Gusri.
3. Wireh jani suba ada,
Gusti Prabu, Kola tangkil sangkan bhakti,
Kewala ampurang tuhu,
Kola tan nawang matura,
Jatma dusun, Miwah tanpa pangeweruh,
Sangkan kola jani teka,
Mula apang nawang Gusti.
4. Ki Petani lintang girang,
Dening sampun, Weruh ring Sang Sri Nrepati,
Rasa wareg tanpa sangu,
Rasa bungah tanpa payas,
Kadi iku, Sang ketunan ngapti hayu,
Mamerih kang jagat dhirga,
Wastu lipya dewek dekil.
5. Sri Narendra dahat ledang,
Apan weruh, Maring Sang prapta menangkil,
Yadyan dekil miwah dusun,
Muwah tan weruh matura,
Idep nulus, Jati – jati hayu nerus,
Gelis Dalem metu sabda,
Ring Ki Petani ne prapti.
6. Nira jati nyuksemayang,
Kerti reku, Maring jagat lintang luwih,
Moga maman dhirga temu,
Pyanak putu sida sadya,
Wastu lantur, Nusa teki hayu nulus,
Wenang maman pareng nira,
Satya maring jagat iki.
7. Ki Petani matur sembah,
Singgih Prabu, Kola mula twah mangiring,
Yadyan kola belog dusun,
Miwah jatma tani mula,
Jiwa tuhu, Anggon kola ngapti hayu,
Kewala Ratu pang ledang,
Ngelah panjak tani tuwi.
8. Antuk sami pada ledang,
Tani dusun, Tumuli manunas pamit,
Pacang budal maring dusun,
Gelis ipun sampun budal,
Lawut lantur, Ceritayang Dalem Myukut,
Sareng Pengabih lan Putra,
Pangenter miwah Sang Rabi.
9. Lintang sasih lintang warsa,
Dalem Myukut, Jenek maring Nusa Puri,
Jangkep ring Rabi lan Sunu,
Jagat Nusa gemah ripah,
Apan tubu, Sang angawa budi sadu,
Kayun lila ngardi becik,
Saha tan lali ring Widhi.
10. Swadarmaning dados Nata,
Yukti sampun, Kaincepang maring hati,
Sad Panyuksemaning Prabu,
Asta Brata tan kalipya,
Tuhu Prabu, Wicaksana ngardi hayu,
Wastu sami panjak bhaktya,
Memanjak ring Nata luwih.
PUPUH DANGDANG.
1. Tattwane lanturang mangkin,
Ida Nata, Maduwe Putra sapta,
Metu saking kalih Rabi,
Kapertama ikang Sunu,
Gusti Dalem ikang nami,
Kaping ruwa Gusti Ngurah,
Kaping trinia Gusti Mur,
Tunggal biyang.
Rabin Ida kaping kalih,
Catur Putra katah nia.
2. I Gusti Lanang kang pertami,
Aran Ida, Sane kaping ruwa,
Gusti Manteb aran yukti,
Gusti Mandesa kaping telu,
Gusti Cucukan caturni,
Maka catur sanak tunggal,
Tunggal ibu ika metu,
Sapta Sanak ngaran Ida,
Kalih biang,
Jati tunggal ikang swami,
Dalem Myukut nora lian.
3. Risampun Ida jenek malinggih,
Maka Nata, Maring jagat Nusa,
Sinareng sunu lan setri,
Kocap Putra sami duwur,
Sampun antes ngemit bumi,
Rika Dalem metu sabda,
Ayat maweh nanak ungguh,
Apan jati Sang ksatriya,
Ngardi kerta,
Mula ika suwadarmi,
Ring Sang kasinengguh Nata.
4. Raris Dalem metu bawos jati,
Uduh nanak, Kita wenang rengwa,
Mangke Bapa mapidarti,
Apan kita sampun duwur,
Aja kita tan ngrengwani,
Rehning Dewa nanak Bapa,
Patut Dewa sane nglantur,
Kertin Bapa maring jagat,
Wantah nanak,
Maka srana Bapa ngapti,
Saking sila hayu Dewa.
5. Mangkin pirengan pesan pang pasti,
Warah Bapa, Maweh nanak genah,
Mangider ring jagat iki,
Apan Bapa wreda sampun,
Patut kemit Nusa teki,
Mangden luput saking corah,
Miwah solah tan rahayu,
Mangka jati idep Bapa,
Sangkan Bapa
Nitah Dewa maka sami,
Mangden sigra marep Bapa.
6. Sadurung I Dewa menampenin,
Wenang Dewa, Siksa maring raga,
Wireh sengka ngemit gumi,
Pangemit sandang katiru,
Olih panjak miwah wargi,
Nika Dewa sandang tatas,
Tan ingan menadi Ratu,
Saluiring madan Raja,
Jatin nia
Kasengguh pinih uttama,
Nika dasar sila Nata.
7. Dhirganing jagat pucukang ugi,
Mangden sida, Nusa teki kerta,
Sane sida ngawe becik,
Wantah para jana iku,
Tekaning Sang nyakra wreti,
Mangden sida kadi apti,
Tatiga pinaka dasar,
Tri Kaya Uttama tuhu,
Manacika kapertama,
Kaping ruwa,
Wacika ngaranya cening,
Kayikane kaping tiga.
8. Ngawit ring kayun den sida bresih,
Tuhu galang, Ngulati kakertan,
Tan maparo tlenging hati,
Idep sudha jati nulus,
Risampun kayune becik,
Den sida metu ring sabda,
Wastu bawos stata hayu,
Ri wus hayu ikang sabda,
Wenang wetwang
Ring laksana sane luwih,
Sukerti ika ngarannya.
9. Laksanane sane ngaran becik,
Ika wantah, Ne manut Agama,
Nika aja Dewa lali,
Apan jati ngardi hayu,
Ika sandang ke utami,
Olih para ngamel jagat,
Mogi sami sida nyusup,
Ring I Dewa maka Sapta,
Asing warah
Sangkan metu saking jati,
Kertan jagat apti Bapa.
10. Cening maka sapta nanak mami,
Jati nia, Dewa nora lian,
Maka sapta tunggal wiwit,
Mula Bapa madwe sunu,
Elingan pisan anggan cening,
Yadyan Dewa lian genah,
Miwah jati lian Ibu,
Bapa sarat mangda sida,
Saling asah
Maka miwah saling asuh,
Paras paros sarpanaya.
PUPUH MEGATRUH.
1. Mangkin Bapa,
Ngicenin I Dewa ungguh,
Becikang cening miragi,
Sampunang cening tan rungu,
Napi malih tan nampenin,
Tampa suwun titah Bapa.
2. Uduh nanak,
I Gusti Mur polih ungguh,
Maring Desa Sekar Taji,
Wenang ngodag para batur,
Aja lali ring swedarmi,
Mogi sida ngardi kerta.
3. Dewa Ngurah,
Mangke kita rengwa tuhu,
Bapa juga maweh linggih,
Tuhu ring pradesa Pangkung,
Aja lali ring pangeling,
Patut cening sane ngawa.
4. Nglantur Bapa,
Mapewarah ring eriku,
Gusti Dalem polih linggih,
Ring Desa Ped jati iku,
Mangka sutanku maka tri,
Wenang kita lakwa kena.
5. Mangkin Dewa,
Gusti Lanang kaping catur,
Cening wantah polih linggih,
Ring pradesa Sompang iku,
Wenang Dewa mangetangin,
Panjake ring Desa Sompang.
6. Kaping lima,
Wantah cening nanak bagus,
Gusti Manteb aran cening,
Nora lian polih ungguh,
Polih ring pradesa Sakti,
Ika sandang Dewa gebag.
7. Lantur nia,
Pireng mangke ujar ulun,
I Gusti Mandesa cening,
Cening jati polih ungguh,
Magenah ring tepi siring,
Desa Suwana ika ngaran.
8. Wuduh nanak,
I Gusti Cucukan tuhu,
Patut kita mangulati,
Genah jenek kita lungguh,
Desa Bucang wenang ungsi,
Ika kemit apang melah.
9. Keto nanak,
Trahing ulun maka pitu,
Sami sampun sinah pasti,
Aja Dewa tan mituhu,
Saluiring ujar mami,
Maka pangeling kawekas.
10. Mangke kita,
Pangetering nanak ulun,
Apan kita tuhu bhakti,
Kita juga polih ungguh,
Desa Pulagan kang nami,
Rika wenang kita wawa.
